Gure eskolak STEM-en bidez ikasleak gaitasun zientifikoaren lorpenera bideratzen ditu. Horretarako matematika, zientzia eta robotika uztartuko dituen bi berrikuntza proiektu garatu ditugu: zientzia arakatuz eta matematika eta robotika jendartea eraldatzeko.
Gaur egungo jendartea etengabe aldatzen ari da mundu industrializatutik informazioan eta ezagutzan oinarritutako mundura eta informazioaren eta komunikazioaren teknologia berrien garapenak eragin handia izan du etengabeko aldaketa hauetan. Gainera, egungo jendarte honen beste ezaugarri bat etengabeko prestakuntza da, herritarrak aldioro ari gara ikasten datozkien aldaketetara egokitzeko. Hortaz, hezkuntzak erronka berriak ditu irakaskuntza-ikaskuntza prozesuan eta erabilitako metodologiak erantzun bat eman behar dio emandako aldaketei.
STEM arloen lanketak eta diziplinartekotasunak aukera ematen die ikasleei ikaskuntzaren ikuspegi holistikoa izateko, ezagutza eraikitzeko moduari ere eraginez. Hartara, problemak ikuspegi globalago eta osoago batetik lantzeko aukera emango du, bai hezkuntza-testuinguruetan bai hezkuntza-testuingurutik kanpo.
Teknologiarekin eta zientziarekin zerikusia duten ezagutzak eskuratzearen aldeko apustuan, aukera ematen du IKTen bidezko teknologia-munduan beharrezkoak diren alfabetatze digitalen gaitasunak ikasteko; izan ere, horiek dira lan- eta gizarte-egoera baten funtsezko oinarrietako bat. Horregatik guztiagatik, egungo gizartean ikaskuntza autonomia eta ikasten ikasteko gaitasuna integratzen dituen hezkuntza-eredua ezinbestekoa da. Bi ezaugarri horien xedea da ikaslea bere ikaskuntzaren protagonista izatea eta errealitatea diziplina anitzeko jardueren bidez ulertzea.
MATEMATIKA MANIPULATIBOAK
Eskola honetan matematika manipulatiboen inguruko formakuntza jaso da, eta beraz, eskolaren egunerokoan horrelako materiala erabiltzen dugu haurrekin matematika lantzerakoan. Honetarako, material ezberdinak erabiltzen dira, Montessori materialak, besteak beste.
